NU-I I BAI A LIAM

Nu-i I Bai a liam

Hmanlai chuan an tia lawm, ‘Pa ber in tapchhakah lungthu tlawh chhanin mei lum a ai a, an bai chhuan chu a so liam bawrh bawrh a, an nu pawn lama buh denglai chu kovin, “Nu-i, i bai chhuan a liam han chawk rawh” an ti a. Nu ber chu thil dang tiin buai hle mah se an hnial ngai lova, mipa chu an che ngai lo a ni’ an ti. Tunlai hunah ve thung chuan, ‘Nu-i i bai a liam han chawk rawh’ tih te zawng khawi lamah, Nu-i eng hmeh nge ka siam dawn, eng nge i duh kan ti ta zawk a nih hi. Mipa \heuh \heuh in ang lo tak kan ni.
A chunga kan sawi ang a inti mipa taka, ‘Nu-i i bai chhuan a liam, han chawk rawh’ an tih ang khi mipa tih dan tur a ni a, mipa chu pa takin an awm tur a ni e ka tihna a ni lova, a phena thil awm, eng vanga hetianga ti ngam hi nge an nih tih hi kan ngaihpawimawh zawk tur chu a ni.
Hmanlai chuan mipate hi an hlu in an pawimawh a, an dinhmun pawh an dah sang thin hle a, ngaihsanawm leh chhuanawm tak pawh an ni reng a ni. Khawtlang tan leh chhungkaw tan an hluin an thlamuanpuiawm in, khawtlang venhim nan chuan lu chhum, ban chhum pawh huamin sa leh ral lakah pawh nunau te muantu an ni a. Engkimah mipa chu a hmahruaitu an ni a, hmeichhia ten an hnung an zui a, in leh lo din leh ei leh bar ngaihtuah reng reng mipa chanvo leh mawhphurhna vek a ni a, chung an mawhphurhna te chu hlen zo ngei turin tan an la a, chutiang tih theih loh chu thih hreh in an hreh thin a ni. Chuvangin in chhungah pawh an lal em em a, ei rawngbawl leh tui chawi leh thingphurh ilo, inchhung chet vel hi chu hmeichhe hnaah an ngai a, an khawih pui ngai lo a ni.
Tunlai kan dinhmun nen han khaikhin chuan in ang lo tak kan ni. Mipa ten drugs leh ruihhlo chi hrang hrang buaipuiin khawtlang leh ram tana tangkaina neih a hnek in, buaipuiawm leh hnawksak kan lo ni ta zawk a nih hi. Chutihlaiin hneichhiate erawh hi chuan an thil tihna kawngah theihtawp chhuahin tan an la a, engkimah a fawng vuantu, a khaidingtu zawk an ni ta zel mai a nih hi. Chhungkaw tam tak chu hmeichhe thawhchhuah a chawm sei len, hmeichhe rorelna hnuai a awm kan tam ta mai. Hmanlai kha chuan mipa chuan chhungkua an chawm thin a ni ngai a, tunah erawh chuan hmeichhiain chhungkua an chawm ta zawk a nih hi. A zahthlakin mipa te kan thanharh a hun ta tak zet mai. Pathianin mihringte a siam danah pawh mipa chu hmeichhiate enkawl a kaihruaitu tur kan nih laiin, hmeichhia zawkin min kaihruai ta zawk mah mah a nih hi. Thalai mipa Two Wheller nei tam zawk hi chu chhungte leisak kan nih laiin hmeichhe Two Wheller nei ho hi chu an thawhchhuaha lei an ni fur a ni. Mipa te puanven sawi chhinga tan lak kan ngai hle a ni.
Mipa ten hmeichhia kan umphak tawh lohzia chu Competitive Exam hrang hrang result han thlir te hian, a top lamah hmeichhe hming hi a lang deuh zel mai a, sorkar hnathawk hmeichhia 62% an nih laiin mipa 38% chauh kan lo ni tawh a, bazar leh dawr hrang hrangah lah hmeichhia te hi mitdel pawnto an sawi ang mai an ni, mipa hmuh tur an vang ta pharh mai.khawnge mipa te kha kan tih chuan hmanlaia hmeichhe hna kha inlamah an lo thawk ve ta thung ni mai awm tak a ni. Tun anga kan kal zel chuan nakin lawkah chuan kan thlang Khasi ho ang khuan hmeichhe in lamah mipa kan la lawi ve lo ang tih pawh sawi har tak a ni ta.
Hmanlai kha chuan, ‘Hmeichhe finin tuikhur ral a kai lo, bumna ngaihah vawi sarih a bum theih’ an lo ti thin a, tunah erawh zawng, thil a lo danglam ta a niang nge. Hmeichhia pawhin an tih duh loh thil tha lo hi, a fing zawk mipa te hian kan lo ti leh mai thin a. Ruihhlo ti thin zingah pawh hmeichhia aiin mipa an tam zawk fe a, thenkhat lah chuan intih changkannan lo hman an tum thul, changkanna hmufum tak chu a ni.
Mipa te hian kawng hrang hrangah tan la thar leh ila, kan hmeichhia te tan a pasal tlak, nupui fanau chawm thei, chhungte pawhin mawhphurhna an pek ngam, mahni mawhphurhna hlenchhuakzo ni tur inbuatsaih thar leh ang u. Pathian thuin“Hmeichhe lu chu Mipa a ni a, mipa lu chu Krista” a tih lai a hmeichhia zawk chhungkuaa roreltu ber a nih tlat chuan eng emaw buai hi a awm duh a, hetiang chhungkua kan rama kan lo tam tak vang pawh hi a ni mai thei a ni, hma kan sawn theih loh na chhan pawh hi. Amaherawhchu, chhungkaw eizawngtu leh a chawmtu ber a nih miau chuan hmeichhia pawh nise, rorelna chu kan pe lo thei si lova, thawhchhuah nei ve lo tan chuan huaisen a har thin a ni.
Hmanlai mipate kha chuan chhungkua an chawm zova, an mawhphurhna an hlen chhuah thin avangin inchhungah pawh an lal em em a, ‘Nu-i, i bai chhuan a liam’ an ti ngam thin a, chutiang bawkin keini pawh hian chhungkuaah thuneihna kan neiha rorelna kan lek kawh ngamna turin ei leh bar zawnna leh kawng hrang hrangah tan kan lak a hun ta hle mai. Nu-i i bai chhuan a liam i ti ve ngam dawn em le?