YMA a kal her em ni?!

    Vawiin chu veng pakhat YMA chanchinbu ka chhiar a, chutah chuan, “Kan veng chhungah zan dar 10 hnu lamah dawr hawn phal a ni lo, a hawng lui chu an chungchang ngaihtuah a ni ang” tih an ziak a. Chu mi ka chhiar atang chuan thil ka ngaihtuah kual mai mai a, kan tunlai YMA kalphung hi ngaihtuahna in lo seng ve ngai hlawm emaw. YMA te hi tlawmngai pawl nge kan nih a, dan siam pawl? Tanpui ngaite tanpui a, mite thlamuantu nge kan nih a, mite tithlabartu leh mi tana harsatna siam saktu zawk kan ni tih hi in lo chhut ve ngai emaw???
    Khi chanchinbu a an ziah khi han ngaihtuah ta ila, miin ei zawnnan, chhungkaw chawmnan dawr an kai a, chu an dawr chu an ei bel ber a ni. Dawrhmun hi a awmna a zir a inhralh kal leh kal lo deuh te a awm thei a, chutiang bawk in a hun thuah pawh zingkar, tlai leh zan lam te pawh min an bawh hunlai a inang lo thei. An dawr an hawn rei avang ringawt khan thil tha lo a thlen phah hi ka ring lem lova, dawr kan siam a nih chuan a leitu an awm chhung chu tunge “tunah chuan ka hralh thei tawh hrih lo?”  ti ngawt duh ang, mi mawl ber pawhin mahni hlawkna tlansan a, mahni customer te hnar ngawt thu lah awm lo. Khi chanchinbu ka chhiar te veng nilo pawh Aizawlah hian veng dangah pawh hetianga khap hi an awm zeuh zeuh a, hethil hi chu inrahbehna, mi chawthleng leihbuak sak angah kei chuan ka ngai.
    Veng pakhat YMA chuan kawngsirah Hall lian tak an sa a, chu Hall bul kawngsir chu lirthei chi hrang hrang dah theihna a ni a. Mahse YMA chuan an hall-a kal te tan chauh dah phal an ti a, chutih laiin an YMA hruaitu te chuan an motor dah nan ber an hmang leh lawi si a, YMA hruaitu te tih atan chuan a mawi chiah lo chuan ka hre thin. A thu hrimah kawng bul hnaia ram an neih avang ngawta, kawngsir, kawng area vek tho si an mahni ta ang maia an humhalh tlat mai hi thil dik ber chu a nih hmel loh ka ti, kawng te chu vantlang ta a ni si a.
    Pakhat kan sawi leh hram teh ang, ruihhlo do chungchang hi. Ruihhlo kan do a, a tha e, sorkar tha tichak tura lo tanpui pawh kan tih ngei tur a ni. Amaherawhchu roreltu leh a hrem theitu ni awm taka, kan mi mante kut kan thlak a, thenkhat phei chu an in te hial kan kalh sak thin hi eng dan nge ni ta ngai. Hmeithai leh chhumchhia te zu fun hnihkhat kan veh kan veh laiin milian leh nei nungte’n a sen chi a case a an kawl ten tun chu kan hmuh kân leh si thin a, rethei leh harsa te thlamuantu leh tanpuitu ni lovin, an tan chuan pawl hlauhawm tak kan lo ni ta der mai. YMA hi khawtlangah hian tu ma ngam loh leh roreltuah kan insiam ta niin a lang.

KAN SCHOOL KAL LAI

           Hman ni lawk emaw tih chhungin kum 20 chuang chu a lo ni ve ta der mai. Kan in atangin School a hlat deuh avangin ka chhungte'n keimaha ka kal theih hunah School min luh tir a. Kum tirah School lut tan ve tur chuan Exercise bu pakhat ak chungin School chu ka thiante nen kan han thleng ve a. Pawnah min han intlar tir a, School lut thei leh thei lo ennan kan kut vei lamin kan chhip lam atangin kan beng min han khawih tir a, kei zawng ka ban a lo sei hlauh a, ka khawih phak ve mai a, School ka lut ve thei chu a ni ta der mai a, kan thian thenkhat beng khawih phak loh avanga kei aia upa lut ve thjei ta hrih lo te pawh an awm.   
            Kan School Kolasib Venglai p/s III-ah chuan a teber chu ka ni lo nangin a te pawl ka ni ve thin a, kha school-a kum li chhung li chhunga kan hun hman dan kha ka rilruah hian a cham reng thin. Kha school-ah khan kan Head Teacher chu Pu Khuangzika nita in ka hria, naupang han enkawl leh tih hlim vel kha a thiam riau mai a, kumtin hian Thlai thar thawhlawm(Mim Kut kan ti tain ka hria), thlai fur awm lai hian kan nei thin a, kan ken khawm ang ang te kha a ei nghal theih chi: anghma, Dawnfawh, Hmazil leh thlai dang dang te pawh kan zirtirtute kaihhruaina hnuaiah kan ei ho a, a thenin vaimim chhumsa te an rawn keng bawk a, thenkhat a hela rawn keng an awm bawk a, a hel pawh school kawtah kan chhum a, hlim takin kan ei ho thin a ni.
           Kha school-a kan kal laia ka chet chhiat em em mai pakhat chu, tumkhat chu kan thianpa pakhat hian "Hawh u ka pute huanah Theihmurkawi i lo ang u" a ti a, a hmun kan han thleng a, kan han lo dawn a, thian dangte kha chuan an lo hre sa nge ni, ka lawn thei lo an ti ta vek mai a, kei engmah hre ve lo chu thei inti tak maiin ka han lawn a, ka lawn sang ta viau a, ka lawhsa ka thlak zel bawk a, chutah le a neitupa a rawn kal ta, kan thianpa ka pu te huan titu ber mai chu a tlan chhe hmasa saah a tang ta mai a, kei a lerah ka la awm si, tih chi loh tak a ni, mahse, khapa pawh khan min khawngaih ve a niang, eng tin mah min ti ta lo. Kha huanah kher kha chuan ka kal leh ta lo a, hmun dangah mi erawh chu kan la lo fo tho mai(Thei ruk hi a thlum bik an lo ti miau a, sim chu a har a niang), kuhva te pawh kan lo thin a, nuam ve mai mai tak chu a ni a hun lai chuan.
           Nuam ve mai mai tak chu chawlhlawk kha rei thei em em mai a, chawlhlawk laia in um kha a ni, pawl leh pawlin kan in um a, Damdawiin tlangah te, Roman ho ram lamah te thui tak tak kan tlan a, pawl dang kan hmuh fuh a kan man hlauh chuan hruiin kan phuar bet a, kan kal san daih zela, a pawl puiten an rawn hmuh fuh loh phei chuan buai thlak ve tak chu a ni. Kha school-ah kha chuan Game ni bik a awm lova, ti mai ang, nitin chawhnu lam khan a class class khan kan inneih chhawk mai a, 11 leh 11 a inkhelh tih vel kha kan ti ve pawn ka hre lo, mipa zawng zawngin khel tur an ti mai a, hmun hnihah kan inthen tawp a, kan indaih thin khawp mai.
            Kan luh tirh khan 'A' pawl tih kha kan ni a, nileng khan kan kal ve thin a, pawl khat kan han kai chho a, a hma 'A' pawl tih thin kha Nursery tiin an thlak a, chutah chuan ka thian kawm ber thin kha a awm a, Nursery an tih atang khan chawhnu pawh an kal ve ngai ta lova, ka thianpa ber chawhnu a chawlh thin takah kha chuan kei pawh chawhnu lam chu ka kal khat khawp mai. Mahse, exam hi chuan ka pass ve leh mai thin a, a lo la har vak lo ni tur a ni. Exam mawlh mai kha kan awlsam, kan thiam zawng tak pawh chhan tur la hre mah ila, kan thiante an zawh tawh kha chuan chhan zel kha a tuiawm tawh thlawt thin lo, kan zirtirtuten chhuah an phal loh kan hlau khan kan pencil hi kan seh chhum daih zel a, ka pencil a bul a, ka dah tawh mai dawn kan ti a, kan dah daih zel.
           Nuam ve leh mai mai tak pakhat chu phul tawlh kha a ni. Kan school thlang lam kha mual awihtlan tha zet mai hi a ni a, chutah chuan phelsep hmangin kan tawlh thin a, thenkhat chu thingzai te pawhin an pate'n an siam sak a, kan awt thei khawp mai. Mombati hi kan han pai a, uluk takin kan han nawt a, a hun lai kha chuan a aia nuam tur chuang kha kan hre chuang lo a ni. Kumtin hian vawi khat tal school naupang tan hian Cinema show kha a awm ziah bawk a, kan school-a an rawn show loh pawhin Cinema Hall-ah min hruai thin a, kan nghakhlel thei a sin aw. A tukah school kan han kal hi chu en theuh theuh hi kan inhrilh sup sup zel mai maw le.