Synod Office

Synod Office Building sak thar, Mission Veng a mi chu ni 11thNovember ‘10(Ningani) chawhnu dar 2:00 khan  Synod Moderator Rev.C.Chawngliana’n a hawng ta.He building thar hi lei chhuatzawl atanga chhiarin chhawng ruk a ni a, Office bakah Committee room tê deuh pahnih leh a lian mi 300 leng vel a awm bawk.
             Synod Office Building thar hawn tak hi kum 2007 July ni 7 zing dar 7:00-ah khatih laia Synod Moderator Rev.Vanlalchhunga’n a lungphum a phum a.Kum thum zet an sak hnuah tunah hian hawn theihin peih a lo ni ta a, ni 11.11.2010 chawhnu dar 2:00 khan Synod Moderator tang lai Rev.C. Chawngliana’n a hawng ta a ni.
     Building thar hawnna inkhawm hi Rev.Vanlalzuata, Sr.Executive Secretary-in a kaihruai a. Rev.Zosangliana Colney, Executive Secretary i/c Property, etc. leh Architect Dr.Lalbiakmawia Ngente ten sak a nih chhoh dan chanchin sawiin Mizoram Synod Choir an zai a; Pathian hnena Office Building thar hlan pahin Synod Moderator-in hawnna thuchah tawi a sawi a; Synod Secretary, Upa Vanlalhuma’n lawmthu a sawi hnuin Rev.Lalchama, Synod Moderator lo ni tawhin malsawmnain inkhawm a tin. He inkhawmah hian sawm bik mi 1000(sang khat) vel an pungkhawm a ni.
     Rev.Zosangliana’n Mizoram Presbyterian Kohhran Synod Office lo awm tan dan leh sak that a lo nih tawh dan te, Office thar sak a nih theih nan a hlui thiat  hnatlangah Bial 32 leh Kohhran mal 129 atangin tha 4524 sen a nih thu a report bakah, he in ropui tak hian Mizoram Presbyterian kohhran ho in lungrualna leh nghehzia a hmutu a piangte hnenah a lantir ang a, he in atang hian Pathian ram zauna leh nghehna tur hna tha tinreng thawh a ni ang tih hi ka beisei leh tawngtaina a ni e” a ti.
    Architect Dr. Lalbiakmawia Ngente in a sak dan report a pe a, Office chungah hian Synod hotute tan bik pindan hran siam a ni a, Synod Officers’ room leh committee room hrang hrang Pathum a awm bawk. A dang zawng hi chu Open Office system a kalpui a ni. A hnuai ber chu motor hunna te, driver room leh thil dahthatna te  a ni a.  Ahnuai ber dawttuah Synod Moderator, Synod Executive Secretary, Office Superintendent, General Administration, Reception Office, Finance Manager, Finance Dept., Pension & Provident Fund leh, Revival Dept. te an awm bawk.
     A chungah Executive Secretary i/c MSSU etc. leh Secretary & Editor, SL&PB room a awm a, chubakah Synod Literature & Publication Board, MSSU, Music, Property, Kohhran Hmeichhia leh Synod Officers’ room te a awm leh a, a chung lehah Executive Secretary i/c Mission etc. room leh Secretary, SMB room, Synod Board, Synod Social Front, Kristian Thalai Pawl, Education leh Committee room a awm leh a ni. A chung lehah Archives, Synod Information & Publicity, Synfo studio I&II leh Committee room te a awm bawk. Chhawng linaah Hall lian tak, JM Lloyd’s Hall-te, thil dahthatna room te, chhawng tinah hian inthiarna room nuam tawk tak te a awm   vek bawk a ni.

Sidney-i tan derhken par by.David Lallawmawma

Sidney-i tan derhken par
       
Pindan khawhar takah chuan darkar li lai mai pawn chhuak lovin a awm tawh a. A mutna khum atang chuan peih leh peih lovin a tho va, a lehkha zirna dawhkana sana te reuh te(Alarm Clock) tlu chu a tung tha a. Sana chuan chawhnu a invai chhuahpui leh tawh tih hai rual a ni lo. Boruak te chu nidang ang bawk a nuam leh sava hram ri pawh hriat tur awm zut mah se, Sidney-i tan chuan lunglen tizualtute mai an ni.
    A awmna Hostel building chu kum 10 chuang thlipui leh ruahpui lo dodai tawhtu, rinawm tak leh dik taka a din avanga a chhunga chengte tana hlimna pe thintu a ni tih hre thin bawk mah se; a thinlung leh a taksa te chu engti ang chiaha nghet leh rinawm nge a ni tih a la suangtuah ngai hauh lo.
    A rilru mawlh tlattu hriatchhuah tum niawm taka tukverh lam a thlir dauh dauh lai chuan thli dainuam leh danglam tak mai, a chenna hmunah pawh a la tawn zen zen loh chu a rawn thawlut ta heuh heuh mai a, a awmna hmun atang chuan a tho kang thuai a, thli chu a tam thei ang ber dawn ngei tuma tukverha a han dahchhuah hnu lawkah thli chu a reh zui leh ta mai a, a hrilhhai hle mai.
    Ni sarih lai a liam leh ta, an khaw biak theihna Telephone Booth(Kawngsira pawisa thir thlaka phone hman mai theih chi) chu misual te leh police intih buaina avangin hman tlak a awm lo mai ni lovin hmeichhia te tana pawn chhuah chu nunna thap ang mai a hlauhawm a ni.
    Chuti ang dinhmuna a awm chuan a thlabar thei hle a, mahse tihtheih a neihsi loh avangin a awmhmunahte chuan  a tawngtai tam phah a, eng emaw mai mai a hun khawhral ai chuan chu a tawngataina a rukin chakna tharui a pe reng phah a..
    Hun a liam zel a, boruak pawh a ralmuang chho tan ta a, mihring sang chuang inanglo tak tak te chu a awmna hostel kianga kawngpuiah chuan an intawksir zut zut reng a, hmelhriat pakhatmah a nei lo chu pawi a tiin a khawhar phah hle thin a ni.
    Tuk dang ang lo takin pawn lam chu a thlir reng a, eng nge a hmuh ni? A tlan chhuak thuai a, mipui sang chuang intawksir zut zutna hmun kawngpui sirah chuan derhken chhe tak a lo par a, tui tlakchham avanga a hnah thenkhat lo ro hman tawh chu dim takin a phawi a. A nuin pangpar dangte dip daltu anga a ngaih thin leh a lo paih fo tawh ni mahsela, Sidney chuan uluk takina enkawl ta a. Lei tha a hmuh ang ang hmangin chawm a, zing ni chhuah rualin bathlarah a dah a, ni a tlak rualin a seng lut leh a. Chutia kar tam pawh a enkawl hma chuan par mawi tak tak a rawn chhuah mai bakah a hnah leh a kungte chu a rawn duhawm ta em em mai a.
    Chu derhken parmawi tak ni a lang chu Sidney-i tan chuan parmawi tak ni mai lovin, hlimna leh tumruhna nasa tak a neih belh theih nana tanpui tu hnai ber a lo ni ta a ni.
    Pathian-in kan tana thil a thuhruk te hria a, hmuthiam tur chuan Sidney-i anga khawngaihna leh lainatna te kan lanchhuahtir hmasak fo hi a ngai thin zawk a ni.